தேர்தல் ஆணையத்தில் பகுஜன் சமாஜ் கட்சி தமிழக வெற்றிக் கழகம் கட்சி கொடியில் யானை சின்னம் பயன்படுத்தப்பட்டுள்ளதை தொடர்ந்து மனு கொடுத்துள்ளது.
கடந்த ஆகஸ்ட் 22ம் தேதி நடிகர் விஜய் தமிழக வெற்றிக் கழகம் கட்சி கொடி மற்றும் பாடலை அறிமுகப்படுத்தினார். கொடியில் சிவப்பு – மஞ்சள் – சிவப்பு நிறங்களில் இரட்டை போர் யானைகளும், நடுவே வாகை மலரும் இடம்பெற்றுள்ளன. விஜய்யின் கட்சி கொடி குறித்து பல்வேறு விமர்சனங்கள் இருந்தன. தேசிய கட்சியான பகுஜன் சமாஜ் கட்சி கொடியில் இடம் பெற்றுள்ள யானையின் உருவத்தை நீக்க வேண்டும், இல்லையென்றால் தேர்தல் ஆணையத்தில் முறையிட போவதாகவும் எச்சரித்திருந்தது. தேர்தல் ஆணையத்தில் பகுஜன் சமாஜ் கட்சியின் மாநில அலுவலக செயலாளர் வழக்கறிஞர் தமிழ்மதி அளித்துள்ள புகாரில், “எங்களுடைய பகுஜன் சமாஜ் கட்சியானது நமது தேசத்தின் அரசமைப்பு தந்தை பாபாசாகிப் டாக்டர் அம்பேத்கரின் கொள்கைகளை மக்களிடம் எடுத்துக் கூறி மக்களின் நம்பிக்கையும் வாக்குகளையும் பெற்று அங்கீகாரம் பெற்ற கட்சியாகும். எங்களது தேர்தல் சின்னமான யானை சின்னத்தை இந்தியா முழுக்க நாங்கள் கொடியிலும் தேர்தல் சின்னமாகவும் பயன்படுத்தி வருகிறோம். பகுஜன் சமாஜ் கட்சி தனது எதிர்ப்பை சம்பந்தப்பட்டவர்களிடம் தெரிவித்தும் அது குறித்து எந்த பதிலும் நடவடிக்கையும் நடிகர் விஜய் எடுக்காமல் இருக்கிறார். அரசியல் நாகரீகம் இல்லாமலும் சட்ட விரோதமாகவும் ஒரு அங்கீகரிக்கப்பட்ட தேசிய கட்சியின் சின்னத்தை தனது புதிய கட்சி கொடியில் பயன்படுத்தியிருக்கும் நடிகர் விஜய் மீது தக்க நடவடிக்கை எடுத்து அவர்தம் கொடியில் உள்ள எங்கள் யானை உருவத்தை அகற்றி மக்களிடையே குழப்பத்தை ஏற்படுத்தாமல் இருக்க தாங்கள் வழி செய்ய வேண்டும்” என அம்மனுவில் வழக்கறிஞர் தமிழ்மதி கூறியுள்ளார்.
