விளையாட்டுத்துறை அமைச்சராக இருக்கும் உதயநிதி துணை முதலமைச்சராக பதவியேற்க போகிறார் என்ற தகவல்கள் வெளியாகி உள்ள நிலையில் அதற்கான பதிலை அவரே கூறியுள்ளார்.
உதயநிதி துணை முதலமைச்சராகப் போகிறார் என்ற செய்தி தற்போது தமிழக அரசியல் வட்டாரத்தில் பெரும் பரபரப்பாக பேசப்படும் செய்தியாக மாறியிருக்கிறது. 2021ம் ஆண்டு தேர்தலுக்கு முன் திமுக இளைஞரணி செயலாளராக களம் இறங்கிய உதயநிதிக்கு சட்டமன்ற தேர்தலில் போட்டியிடும் வாய்ப்பு வழங்கப்பட்டது. சட்டமன்ற தேர்தலில் திமுக வென்றபோதே உதயநிதிக்கு அமைச்சர் பதவி வழங்கப்படும் என்று பரவலாக பேசப்பட்டது. ஆனால் அந்த சர்ச்சைகள் அடங்கும் வரை எம்.எல்.ஏவாகவே தொடர்ந்த அவருக்கு அதற்கு பிறகு விளையாட்டுத்துறை அமைச்சர் பதவி வழங்கப்பட்டது. தற்போது அவருக்கு துணை முதலமைச்சர் பதவி என்ற கிசுகிசுப்புகள் தொடங்கியுள்ளது. இதுகுறித்து நேற்று பொங்கல் பரிசு வழங்கும் நிகழ்ச்சியில் கலந்து கொண்ட உதயநிதி ஸ்டாலினிடம் கேட்கப்பட்டது. அதற்கு அவர் “எல்லா அமைச்சர்களுமே முதலமைச்சருக்கு துணையாக இருப்போம்” என்று கூறி சென்றார். எனினும் சேலம் திமுக இளைஞரணி மாநாட்டிற்கு பிறகு இந்த புதிருக்கு விடை கிடைக்கும் என கூறுகின்றனர் அரசியல் வட்டாரங்களை சார்ந்தோர்கள்.
