தேமுதிக பொதுச் செயலாளர் பிரேமலதா தேமுதிகவிற்கு மாநிலங்களவை உறுப்பினர் பதவி வழங்குவதாக அதிமுக உறுதி அளித்துள்ளதாகவும், வேட்பாளர் யார் என்பது குறித்து விரைவில் அறிவிக்கப்படும் என்றும் தெரிவித்துள்ளார்.
இன்று அதிமுக பொதுச் செயலாளர் எடப்பாடி பழனிச்சாமி தேமுதிக தலைமை அலுவலகத்திற்கு சென்றார். கேப்டன் விஜயகாந்த் நினைவிடத்தில் அஞ்சலி செலுத்திய எடப்பாடி, பின் பிரேமலதாவுடன் ஆலோசனை மேற்கொண்டார். ஆலோசனைக்கு பிறகு செய்தியாளர்களிடம் பேசிய பிரேமலதா, “அதிமுக கூட்டணி சார்பில் மார்ச் 24ம் தேதி திருச்சியில் மாபெரும் பொதுக்கூட்டம் நடைபெற உள்ளது. அதற்கு அழைப்பு விடுக்கவே எடப்பாடி பழனிச்சாமி என்னை சந்திக்க வந்தார். திருச்சி பொதுக்கூட்டத்தில் தேமுதிக கண்டிப்பாக பங்கேற்கும். 40 தொகுதிகளின் வேட்பாளர்களை பொதுக்கூட்டத்தில் அறிமுகம் செய்து வைத்து, அன்றைய தினமே பிரச்சாரத்தை தொடங்க இருக்கிறோம். 40 தொகுதிகளிலும் அதிமுக கூட்டணி அமோக வெற்றி பெறும். ராஜ்யசபா சீட் உறுதி செய்யப்பட்டுள்ளதால், வேட்பாளர் யார் என்ற விவரம் பின்பு அறிவிக்கப்படும்” என்று தெரிவித்தார்.
